யானையோ யானை

’இம்பர்வான் எல்லை இராமனையே பாடி

என்கொணர்ந்தாய் பாணா?’ என்றாள் பாணி,

’வம்பதாம் களபம்’ என்றேன், ‘பூசும்’ என்றாள்.

‘மாதங்கம்’ என்றேன், ‘யாம் வாழ்ந்தேம்’ என்றாள்.

’பம்பு சீர் வேழம்’ என்றேன். ‘தின்னும்’ என்றாள்.

‘பகடு’ என்றேன், ‘உழும்’ என்றாள், பழனம் தன்னை

‘கம்ப மா’ என்றேன், ‘நல் களியாம்’ என்றாள்.

‘கைம்மா’ என்றேன், சும்மா கலங்கினாளே!

நூல்: தனிப்பாடல்

பாடியவர்: வீரராகவ முதலியார்

முன்கதை

ஒரு பாணன். அவனுடைய குடும்பம் வறுமையில் வாடுகிறது.

அந்த ஊரில் இராமன் என்ற பணக்காரன் இருந்தான். அவனைச் சந்தித்துப் பாடிப் பரிசு பெற்று வரலாம் என்று இந்தப் பாணனுக்கு ஆசை.

பாணனின் பாட்டு இராமனுக்கு ரொம்பப் பிடித்திருந்தது. மகிழ்ச்சியாக அவனுக்கு ஒரு யானையைப் பரிசளித்தான்.

அடுத்த வேளைச் சாப்பாட்டுக்கே கஷ்டப்படும் குடும்பம், யானையை வைத்துக்கொண்டு என்ன செய்யும்? தலையைச் சொறிந்தபடி வீடு திரும்புகிறான் பாணன். அங்கே…

உரை

மனைவி (பாணி): ‘இராமன் என்கிற வள்ளலின் புகழ் பூமியெங்கும் வானமெங்கும் பரந்திருப்பதாகச் சொல்வார்கள், அப்படிப்பட்ட இராமனைச் சந்தித்துப் பாடச் சென்றாயே, அங்கே என்ன நடந்தது? என்ன பரிசு பெற்றுவந்தாய்? எங்களூக்கு என்ன கொண்டுவந்தாய்?

பாணன்: வம்பதாம் களபம் (கயிறு அணிந்த யானை)

பாணி: ஓ, வாசனை உடைய சந்தனத்தைப் பெற்றுக்கொண்டுவந்தாயா? நல்லது, அதை நீயே பூசிக்கொள்!

பாணன்: சந்தனம் இல்லை, மாதங்கம் (யானை)

பாணி: ஓ, மா தங்கம், உயர்ந்த தங்கத்தைப் பரிசாகப் பெற்றுவந்தாயா? இனி நம் துன்பம் தீர்ந்தது, நாம் மகிழ்ச்சியாக வாழலாம்

பாணன்: தங்கம் இல்லை, பம்பு சீர் வேழம் (நிறையப் புகழ் உடைய யானை)

பாணி: ஓ, செழிப்பான கரும்புதான் பரிசாகக் கிடைத்ததா? சரி, அதைக் கொண்டு வா, முறித்துச் சாப்பிடலாம்

பாணன்: கரும்பு இல்லை, பகடு (யானை)

பாணி: ஓ, வள்ளல் உனக்கு எருமைக்கடாவைக் கொடுத்தாரோ? பரவாயில்லை, நம் வயலை உழுவதற்கு அதைப் பயன்படுத்திக்கொள்ளலாம்

பாணன்: எருமை இல்லை, கம்ப மா (அசைகின்ற யானை)

பாணி: ஓ, கம்ப மா, கம்பினால் செய்யப்பட்ட மாவு பரிசாகக் கிடைத்ததோ? கொண்டு வா, அதை வைத்து நல்ல களி கிண்டித் தின்னலாம்

பாணன்: கம்பு மாவு இல்லை, கைம்மா (கையை உடைய விலங்கு)

பாணி: அடடா, யானையா? அதை வைத்துக்கொண்டு நாம் என்ன செய்வது? (கலங்கி நிற்கிறாள்)

துக்கடா

• அத்தனை அவலத்திலும் கணவனும் மனைவியும் சிலேடையாக வார்த்தை விளையாட்டு நடத்துகிறார்கள். கணவன் மாறி மாறி யானைக்கான வெவ்வேறு சொற்களை அடுக்குகிறான், மனைவி அதை நம்ப விரும்பவில்லை, வேண்டுமென்றே அதே வார்த்தைகளுக்கான வேறு பொருள்களைச் சொல்லிச் சமாளிக்கிறாள், கடைசியில் உண்மை நிலை அறிந்து இருவரும் வேதனையில் மூழ்குகிறார்கள்
• அடுத்து என்ன நடந்திருக்கும்? பாணனின் யானையை யாராவது விலைக்கு வாங்கிக்கொண்டிருப்பார்களோ? குறைந்தபட்சம், இந்த அருமையான பாட்டுக்காகவாவது இன்னொரு வள்ளல் அவனுக்கு ஓர் உருப்படியான பரிசு கொடுத்து ஆதரித்திருக்கவேண்டும்!
• இந்தப் பாடலைப் பாடிய கவிஞர் கண் பார்வை இல்லாதவர், ’அந்தகக்கவி’ என்று அழைக்கப்படுகிறவர்
• இன்றைய அருமையான பாடலைத் தேர்ந்தெடுத்துத் தந்தவர் பத்மா அர்விந்த் (http://twitter.com/#!/padmaa). அவருக்கு நன்றிகள்

186/365