அருள அருள் செய்!

உம்பர் தரு, தேனு, மணிக் கசிவாகி,

….ஒண்கடலில் தேன் அமுது உணர்வு ஊறி,

இன்ப ரசத்தே பருகிப் பலகாலும்,

….எந்தன் உயிர்க்கு ஆதரவு உற்று அருள்வாயே,

தம்பி தனக்காக வனத்து அணைவோனே,

….தந்தை வலத்தால் அருள் கைக் கனியோனே,

அன்பர் தமக்கு ஆன நிலைப் பொருளோனே,

….ஐந்து கரத்து ஆனை முகப் பெருமாளே!

நூல்: திருப்புகழ் (விநாயகர் துதி #3)

பாடியவர்: அருணகிரிநாதர்

(அடிக்கோடிடப்பட்டுள்ள வார்த்தைகள் பாடலில் இல்லை, வாக்கிய ஓட்டம் தடைபடாமல் இருப்பதற்காக நான் சேர்த்தவை)

ஐந்து கரங்களையும் யானை முகத்தையும் கொண்ட விநாயகனே,

தம்பி முருகனுக்கு உதவி செய்வதற்காக யானை உருவம் எடுத்துக் காட்டுக்குள் வந்தவனே,

தந்தை, தாயை வலம் வந்து ஞானப் பழத்தைப் பரிசாகப் பெற்றவனே,

பக்தர்களுக்காக என்றும் நிலைத்திருப்பவனே,

தேவர்கள் உலகத்தில் உள்ள கற்பக மரமும் காமதேனுவும் சிந்தாமணியும் யார் என்ன கேட்டாலும் அள்ளித் தருகின்ற வள்ளல் குணத்தைக் கொண்டவை. அப்படிப்பட்ட ஓர் ஈகைத்தன்மையை நானும் பெறவேண்டும், எல்லோருக்காகவும் உள்ளம் கசிந்து வாரி வழங்கவேண்டும், அதன்மூலம் கிடைக்கிற சந்தோஷம், அன்றைக்குப் பாற்கடலில் கிடைத்த இனிய அமுதத்துக்கு இணையானது.

விநாயகனே, அடுத்தவர்களுக்கு அள்ளித் தருவதால் கிடைக்கும் அந்த இன்ப ரசத்தை நான் ரொம்ப நாளைக்குப் பருகிக்கொண்டே இருக்கவேண்டும், அதற்கு நீதான் அருளவேண்டும்!

துக்கடா

• இந்த எட்டு வரிப் பாட்டுக்குள் எத்தனை குட்டிக் கதைகள்: அதென்ன கற்பக மரம்? காமதேனு யார்? சிந்தாமணி யார்? கடலில் அமுதம் எப்படி வந்தது? தம்பிக்காக விநாயகர் ஏன் வனத்துக்குள் செல்லவேண்டும்? அப்பா அம்மாவை வலம் வந்தால் ஞானப் பழம் கிடைக்குமா? விநாயகர்க்கு ஆனைத் தலை எப்படி வந்தது?… குழந்தைகளுக்கு இந்தப் பாட்டைச் சந்தத்தோடு சொல்லித் தந்து ஒவ்வொரு கதையாக விவரித்தால் ஜஸ்ட் எட்டே வரிக்கு ஒரு மணி நேரம் ஓடிவிடும், திருமுருக. கிருபானந்த வாரியாரின் ஸ்டைல் அது 😉
• விநாயகரிடம் அருணகிரிநாதர் கேட்கும் வரத்தைப் பாருங்கள்: ‘எனக்கு என்று உன்னிடம் நான் எதையும் கேட்கமாட்டேன், அப்படியே நீ எதையாவது கொடுத்தாலும்கூட, அதையெல்லாம் சுயநலத்தோடு பேங்க் லாக்கரில் பதுக்கிவைத்துக்கொள்கிறவனாக என்னை மாற்றிவிடாதே, அடுத்தவர்களுக்கு வாரி வழங்குவதுதான் உண்மையான சந்தோஷம், அதை நான் எப்போதும் மறந்துவிடாமல் இருக்க அருள் செய், வாழ்நாள்முழுக்க நான் கொடுத்துக்கொண்டே இருக்கவேண்டும், அந்த இன்ப ரசத்தை அனுபவிக்கவேண்டும்.’
• அனைவருக்கும் இனிய புத்தாண்டு நல்வாழ்த்துகள்!

179/365