என்றென்றும் வாழ்க

பல்லாண்டு பல்லாண்டு பல்லாயிரத்தாண்டு பல கோடி நூறாயிரம்

மல்லாண்ட திண் தோள் மணிவண்ணா, உன் சேவடி செவ்வித் திருக்காப்பு!

*

அடியோமோடும் நின்னோடும் பிரிவு இன்றி ஆயிரம் பல்லாண்டு

வடிவாய் நின் வல மார்பினில் வாழ்கின்ற மங்கையும் பல்லாண்டு

வடிவு ஆர் சோதி வலத்துறையும் சுடர் ஆழியும் பல்லாண்டு

படை போர் புக்கு முழங்கும் அப் பாஞ்சசன்னியமும் பல்லாண்டே!

நூல்: நாலாயிரம் திவ்யப் பிரபந்தம் / ஆழ்வார்கள் அருளிச் செயல்

பாடியவர்: பெரியாழ்வார்

இறைவா,

நீ பல்லாண்டு பல்லாண்டு வாழ்க! பல ஆயிரம் ஆண்டுகள் வாழ்க! பல கோடி நூறாயிரம் ஆண்டுகள் வாழ்க!

மல்லர்களை அடக்கிய பலமான தோள்களை உடைய மணிவண்ணா, உன் சிவந்த திருவடியின் அழகு என்றைக்கும் குறைவில்லாதபடி காப்பாற்றப்படட்டும்.

அழகாக உன்னுடைய வலது பக்க மார்பில் குடிகொண்டிருக்கும் எங்கள் தாயாரும் பல்லாண்டு வாழட்டும்!

ஒளிமயமான உன்னுடைய அழகு மேனியின் வலது கையை அலங்கரிக்கிற சுடர் ஆழியும் பல்லாண்டு வாழட்டும்!

யுத்தங்களில் புகுந்து முழங்குகின்ற பெருமையுடைய உன் பாஞ்ச சன்னியமும் பல்லாண்டு வாழட்டும்!

இந்தப் பல்லாண்டுகளும், உன்னோடும் உன்னுடைய அடியார்களோடும் நாங்கள் பிரிவின்றிச் சேர்ந்திருக்கவேண்டும்.

துக்கடா

• வழக்கமாக எல்லாரும் இறைவன் முன்னால் வணங்கி நின்று நீண்ட வாழ்வுக்காக வேண்டுவார்கள். ஆனால் இங்கே பெரியாழ்வார் இறைவனையே ’பல ஆண்டுகள் வாழ்க’ என்று வாழ்த்துகிறார். அதோடு நிறுத்தவில்லை, தாயார், சங்கு, சக்கரம் என்று சகலத்துக்கும் பல்லாண்டு பாடுகிறார். அந்தப் பல்லாண்டுகளும் நாங்களும் உன்னைச் சேர்ந்து, உன்னை நினைத்தபடி வாழவேண்டும் என்கிறார்
• அது சரி, இறைவனை நாம் வாழ்த்தலாமா? தப்பில்லையோ?
• பக்தியின் முதிர்ச்சி நிலைகளில் ஒன்றுதான் இது. கடவுள்மேல் அளவற்ற பாசம் ஏற்பட்டுவிட்டால், இந்த உலகத்தில் அவருக்கு ஏதேனும் தீங்கு நேர்ந்துவிடுமோ என்கிற அச்சம் (அர்த்தமற்றதாக இருப்பினும்) ஏற்படுகிறது, அப்படி எதுவும் நடக்காமல் அவர் பல்லாண்டு வாழட்டும் என்று உருகிப் பாடத் தோன்றுகிறது பெரியாழ்வாருக்கு!

286/365

Advertisements