நீ இல்லாத வீடு

காதலர் உழையர் ஆகப் பெரிது உவந்து

சாறுகொள் ஊரில் புகல்வேன் மன்ற;

அத்தம் நண்ணிய அம்குடிச் சீறூர்

மக்கள் போகிய அணில் ஆடு முன்றில்

புலப்பில் போலப் புல்லென்று

அலப்பென் தோழி! அவர் அகன்ற ஞான்றே!

நூல்: குறுந்தொகை (#41)

பாடியவர்: அணில் ஆடு முன்றிலார்

சூழல்: பாலைத் திணை, காதலனைப் பிரிந்த காதலி தன்னுடைய வேதனையைச் சொல்கிறாள்

’சுருக்’ உரை:

தோழி, அவன் பக்கத்தில் இருந்தால், இந்த உலகம்முழுக்கக் கொண்டாட்டமாகத் தெரிகிறது. பிரிந்து போய்விட்டான் என்றால், பாழடைந்த வீட்டைப்போல ஆகிவிடுகிறேன் நான்!

முழு உரை:

(அடிக்கோடிடப்பட்டுள்ள வார்த்தைகள் பாடலில் இல்லை, வாக்கிய ஓட்டம் தடைபடாமல் இருப்பதற்காக நான் சேர்த்தவை)

தோழி,

அழகிய வீடுகளைக் கொண்ட சின்னக் கிராமம் நம்முடையது. என் காதலன் பக்கத்தில் இருந்தால், காட்டுக்குள் உள்ள அந்தச் சிறிய ஊர்கூட விழாக் கொண்டாடும் பெரிய நகரத்தைப்போல் எனக்கு உற்சாகமாகத் தெரிகிறது.

ஆனால், அவன் என்னைவிட்டுப் பிரிந்து சென்றுவிட்டால், மறுவிநாடி தாங்கமுடியாத தனிமை என்னைச் சூழ்ந்துகொள்கிறது. மக்கள் யாரும் இல்லாமல் அணில்கள்மட்டுமே துள்ளி விளையாடுகிற முற்றத்தைக் கொண்ட பாழடைந்த வீட்டைப்போல் நான் துவண்டுபோகிறேன்!

துக்கடா

  • இந்தப் பாடலை எழுதியவரின் நிஜப் பெயர் தெரியவில்லை. ஆகவே, அவரது பாடலில் வரும் ‘அணில் ஆடு முன்றில்’ என்ற வார்த்தையையே அவருக்கும் பெயராகச் சூட்டிவிட்டார்கள்!
  • கிட்டத்தட்ட இதே அர்த்தத்தில் நிறைய சினிமாப் பாடல்களைக் கேட்டிருப்பீர்கள். உதாரணமாக, ‘தளபதி’யில் வாலி எழுதிய ‘சோலையிலும் முட்கள் தோன்றும் நீயும் நானும் நீங்கினால், பாலையிலும் பூக்கள் பூக்கும், நான் உன் மார்பில் தூங்கினால்.’
  • இன்றைய அரிய சொல் : அத்தம் = காடு
  • உதாரணங்கள்:
  • 1. கல் அலர் அத்தத்தை… : ஐந்திணை ஐம்பது
  • 2. புள் அத்த மார்க்கம் : திருப்புகழ்

136/365

Advertisements
This entry was posted in அகம், காதல், குறுந்தொகை, சினிமா, பாலை, பிரிவு. Bookmark the permalink.

5 Responses to நீ இல்லாத வீடு

  1. amas32 says:

    “மக்கள் யாரும் இல்லாமல் அணில்கள்மட்டுமே துள்ளி விளையாடுகிற முற்றத்தைக் கொண்ட பாழடைந்த வீட்டைப்போல்” இந்த உவமை சோகமான தனிமையை கண் முன்னே கொண்டு வந்து நிறுத்துகிறது! இன்றைய கால கட்டத்தில் காதலனை பிரிந்த காதலி மட்டும் அல்ல பிள்ளைகள் தூர தேசத்தில் வாழ்ந்து கொண்டு தனிமையில் வாடும் பெற்றோர்களும் இதே நிலையில் தான் உள்ளனர்.
    amas32

    • GiRa says:

      மிகமிகச் சரியாகச் சொன்னீர்கள். பெற்றோர்கள் பக்கத்திலேயே இருக்கக் கூடாது என்று இருக்கும் கூட்டமும் உள்ளது. அடிக்கடி போன் செய்து பேசி விட்டால் போதும் என்று நினைக்கும் அக்கறை இல்லாத அக்கரைவாசிகளை நினைத்தால் சற்று எரிச்சலாகத்தான் இருக்கிறது. யாரையும் குறிப்பிட்டுச் சொல்லவில்லை. அப்படி எடுத்துக்கொண்டால் மன்னிக்கவும்.

    • மிகமிகமிகச் சரியாகச் சொன்னீர்கள்:)
      இந்த அக்கறையில்லா அக்கரைவாசிகளை என்ன செஞ்சாத் தகும்?:)
      அது என்னமோ தெரியல, திடீர்ச் சந்தர்ப்பச் சூழ்நிலைகளால், சில திங்களுக்குள், அக்கரை இக்கரை ஆகிவிடும் போல இருக்கு!!:)

  2. GiRa says:

    இந்தப் பா ரொம்பவே அரிய பா. எப்படீன்னு கேக்குறீங்களா? அணிலாடு முன்றிலார் எழுதிக் கிடைத்த ஒரே பா இதுதான். எட்டுத்தொகை நூலில் இவர் எழுதிய வேறெந்த பாட்டும் இல்லை. ஒருவேளை இவரோட உண்மையான பேர் தெரிஞ்சிருந்தா கண்டுபிடிக்கலாம். ஆனா அவர் எழுதுன பாட்டிலுள்ள வரியே அவருக்குப் பேராகும் அளவுக்கு மக்களுக்கு பாட்டு பிடிச்சுப் போச்சு.

    நற்செள்ளையார்தான் காக்கைப்பாடினியார்னு சொல்ல முடிஞ்ச அளவுக்கு இவரோட இயற்பெயர் நமக்குத் தெரியாமப் போனது வருத்தமே!

  3. GiRa says:

    தன்னைப் பால் என்று சொல்லி அது வீணாகப் போவதை அழகாக “கன்றும் உண்ணாது” பாடலில் எடுத்துச் சொன்னார் வெள்ளிவீதியார்.

    இங்கு தன்னை வீடாக உருவகித்து அது வீணாகிக் கிடப்பதை எடுத்துச் சொல்லித் தனிமையை விளக்குகிறார் அணிலாடு முன்றியலார்.

    அருந்தினால்தான் பால். வாழ்ந்தால்தான் வீடு. கூடி இருந்தால்தான் உறவு.

    இந்தப் பாடலில் இருந்து ஒரு செய்தியையும் நாம் தெரிந்து கொள்ள வேண்டும். அந்தக் காலத்திலேயே வளம் குன்றிய பொழுது மக்கள் தாமிருக்கும் இடம் நீங்கி வேறோர் இடம் செல்லும் வழக்கம் இருந்திருக்கிறது. அப்பொழுது வீடுகள் வாழும் மக்கள் இல்லாது பாழடைந்து போயிருக்கின்றன.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s