அவன் உரை

அட்டு ஆனானே குட்டுவன் அடுதொறும்

பெற்று ஆனாரே பரிசிலர் களிறே

வரைமிசை இழிதரும் அருவியின் மாடத்து

வளிமுனை அவிர்வரும் கொடி நுடங்கு தெருவில்

சொரிசுரை கவரு நெய்வழிபு உராலின்

பாண்டில் விளக்குப் பரூஉச் சுடர் அழல

நல்நுதல் விறலியர் ஆடும்

தொல் நகர் வரைப் பின் அவன் உரை ஆனாவே

நூல்: பதிற்றுப் பத்து (#47)

பாடியவர்: பரணர்

பாடப்பட்டவன்: சேரன் கடல் பிறக்கோட்டிய செங்குட்டுவன்

திணை: பாடாண், துறை: செந்துறைப் பாடாண் பாட்டு

(அடிக்கோடிடப்பட்டுள்ள வார்த்தைகள் பாடலில் இல்லை, வாக்கிய ஓட்டம் தடைபடாமல் இருப்பதற்காக நான் சேர்த்தவை)

சேரன் செங்குட்டுவன் தன்னுடைய பகைவர்கள் எல்லோருடனும் போரிட்டான், அவர்களை அடியோடு அழித்துவிட்டான், ஆனாலும் அவனுக்கு அமைதி கிடைக்கவில்லை. எங்கோ இருக்கிற பகைவர்களைத் தேடிப் போய்ச் சண்டையிட்டான். வெற்றி பெற்றான். புலவர்கள் அவனுடைய வீரத்தையும் போர்ச் சிறப்பையும் புகழ்ந்து பாடினார்கள். அவன் அவர்களுக்குப் பல யானைகளைப் பரிசாகத் தந்தான்.

மாடங்களின்மேல் கட்டப்பட்டுள்ள கொடிகளைக் காற்று அசைக்கிறது. அதைப் பார்க்கும்போது மலையிலிருந்து சரிந்து விழுகிற அருவியைப்போலவே தோன்றுகிறது. அப்படிப்பட்ட தெருவில் உள்ள விளக்குகளில் நெய் வழிய வழிய ஊற்றப்பட்டுள்ளதால் அவை நன்கு பிரகாசமாக எரிகின்றன. நல்ல நெற்றியை உடைய விறலியர்(பெண் பாணர்)கள் பழைய மாளிகைகளைக் கொண்ட ஊரெங்கும் அவனுடைய புகழைப் பாடிக்கொண்டே செல்கிறார்கள். அந்த வார்த்தைகள் என்றைக்கும் நீங்காமல் நிலைத்து நிற்கின்றன.

துக்கடா

  • பதிற்றுப் பத்து என்பது சேர மன்னர்களைப் பற்றிய 10 * 10 = 100 பாடல்கள், இதில் முதல் பத்தும் கடைசிப் பத்தும்மட்டும் கிடைக்கவில்லை. மற்ற 80 பாடல்கள் கிடைத்துள்ளன
  • இந்தப் பாடலில் விளக்கைப் பற்றி வருகிற வரிகள் மிகவும் நுணுக்கமானவை. ’பாண்டில் விளக்கு’ என்றால் ‘அகல்போல விரிந்து, ஒருபக்கத்தில் குவிந்து, அங்கே ‘சிரை’ என்ற குழாயினுள் திரி பொருத்தப்பட்டிருக்கும் விளக்கு’. அந்தக் காலத்தில் சேலம், வட ஆற்காடு மாவட்டங்களில் இந்த விளக்கு மிகவும் பிரபலமாம். மூங்கிலை உயரமாக நட்டு, அவற்றின் உச்சியை மூன்றாகப் பிளந்து அதன் நடுவே மண்ணால் ஆன விளக்கைப் பொருத்துவார்களாம், அதில் எண்ணெய் ஊற்றி, தடிமனான திரியைப் போட்டு எரிப்பார்களாம். கூத்து நிகழ்ச்சிகளை நடத்தும்போது வலதுபக்கம் ஒன்று, இடதுபக்கம் ஒன்று என இந்த விளக்குகளை வைப்பார்களாம் (தகவல்: பதிற்றுப் பத்து – அ. மாணிக்கனார் உரை – வர்த்தமானன் பதிப்பகம், சென்னை)
  • நான் தேடியவரை இந்த விளக்கின் படம் கிடைக்கவில்லை. உங்களுக்குக் கிடைத்தால் பின்னூட்டத்தில் சொல்லுங்கள், பதிவில் சேர்த்துவிடலாம்
  • ‘நல் நுதல்’ என்றால் ‘நல்ல நெற்றி’ – பெண்களுக்கு நெற்றி சிறிதாக இருந்தால் அழகு என்று அந்தக் காலத்தில் ஒரு நம்பிக்கை
  • ‘அட்டு’ என்றால் இந்தக் காலத்தில் குறும்பான ஒரு பொருள் உள்ளது. ஆனால் அன்றைக்கு ‘அட்டு’ என்றால் அழிப்பது – ‘இகல் அட்டு கையது கணிச்சியொடு மழுவே’ என்று சிவபெருமானைப் புகழ்கிற ஒரு பழைய பாட்டு உண்டு. ’இகல்’ என்றால் பகை, ’அட்டு’ என்றால் அழித்தல், ’பகையை அழிப்பதற்காகக் கையில் மழு ஆயுதத்தை வைத்திருக்கிறாய்’!

084/365

Advertisements
This entry was posted in சிவன், சேரன், பதிற்றுப்பத்து, புறம். Bookmark the permalink.

One Response to அவன் உரை

  1. ’பாண்டில் விளக்கு’

    கிராமத்தில் பாரதக் கதை – திரெளபதி அம்மன் கூத்து போது, இந்த விளைக்கையே பயன்படுத்துவாங்க!
    = கூத்து விளக்கு/பாண்டி விளக்கு என்பது பேச்சு மொழி!

    மூங்கில் கழி, மேலாக்காப் பிசிறாச் சீவி…அந்த மேல்கதுப்பல மண் (அ) இரும்பு அகல்…
    வழக்கமான அகல் விளக்கு தான், ஆனா வாய்ப்புறம் மட்டும் தட்டையா இருக்கும்…
    அதுல திரி போடாம, நாணக் குழாயை வைப்பாங்க!

    நாணக் குழாய்க்குள் கர்ப்பூரம் தடவி, தடிமனான துணியைத் திரியா உருட்டி வைப்பாங்க!
    பத்த வச்ச உடனேயே, கர்ப்பூரத்தால் பத்திக்கும்!

    நாணக் குழாய்க்குள்ளும் எண்ணெய் ஏறுவதால், தீபம், தீபமா எரியாம, பெரிய கொழுந்தாய் எரியும்!

    கூத்து முடியற வரைக்கும், தூண்டத் தேவையில்லாதபடி, நாணல் குழாயுள் எண்ணெய் சுரந்துக்கிட்டே, வெளிச்சம் பிரகாசமா இருக்கும்!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s